ឯកឧត្តមទេសរដ្ឋមន្ត្រី ស៊ុន ចាន់ថុល តំណាងដ៏ខ្ពង់ខ្ពស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បាននាំយកម៉ាស៊ីនផលិតទឹកបរិសុទ្ធដោយបរិយាកាស-WATERGEN ១គ្រឿងជូនមន្ទីរពេទ្យមិត្តភាពខ្មែរ-សូវៀត
ថ្ងៃ ពុធ ទី ០៤ ខែ វិច្ឆិកា ឆ្នាំ ២០២០

ភ្នំពេញ៖ ថ្ងៃអង្គារ ៣រោច ខែកត្តិក ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី០៣ ខែវិច្ឆិកា ឆ្នាំ២០២០ ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន តំណាងដ៏ខ្ពង់ខ្ពស់សម្តេចអគ្គ មហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអញ្ជើញជាអធិបតីក្នុងពិធីប្រគល់-ទទួលម៉ាស៊ីនផលិតទឹកបរិសុទ្ធដោយបរិយាកាស-WATERGEN (ប្រភេទ GEN-M) ដែល ជាអំណោយដ៏ថ្លៃថ្លារបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ជូនមន្ទីរពេទ្យមិត្តភាពខ្មែ-សូវៀត ដោយមានការអញ្ជើញចូលរួមពី មន្ត្រីជាន់ខ្ពស់ក្រសួង លោកសាស្ត្រាចារ្យ ងី  ម៉ែង នាយកមន្ទីរពេទ្យខ្មែរ-សូវៀត និងបុគ្គលិក មន្ត្រីរាជការ ក្រោមឱវាទមន្ទីរពេទ្យផងដែរ។

ថ្លែងក្នុងពិធីប្រគល់-ទទួលនាឱកាសនោះ ឯកឧត្តមទេសរដ្ឋមន្ត្រីបានគូសបញ្ជាក់អំពីលក្ខណៈពិសេស ម៉ាស៊ីនផលិតទឹកបរិសុទ្ធដោយបរិយាកាសធម្មជាតិ-WATERGEN (ប្រភេទ GEN-M) ជាបច្ចេកវិទ្យា មកពីប្រទេសអ៊ីស្រាអែល មានសមត្ថភាពអាចផលិតទឹកបរិសុទ្ធដោយស្វ័យប្រវត្តិពីខ្យល់ក្នុងបរិយាកាស បានប្រមាណ៨០០លីត្រក្នុងមួយថ្ងៃ ដោយមិនចាំបាច់តភ្ជាប់ជាមួយប្រភពទឹកទុយោ និងអាចផ្គត់ផ្គង់ទឹក ប្រកបដោយគុណភាព សុវត្ថិភាពខ្ពស់ និងកាត់បន្ថយផលប៉ះពាល់បរិស្ថានផ្សេងៗថែមទៀតផង។

ឯកឧត្តមទេសរដ្ឋមន្ត្រី បានឱ្យដឹងថា៖ នេះជាម៉ាស៊ីនទីបួនហើយ ដែលសម្ដេចនាយករដ្ឋមន្ត្រី និងសម្តេច កិត្តិព្រឹទ្ធបណ្ឌិត បានប្រគល់ជូនដល់មន្ទីរពេទ្យ និងកាកបាទក្រហម ក្នុងនោះរួមមាន៖ ម៉ាស៊ីនទីមួយត្រូវ ត្រូវបានផ្ដល់ជូនមន្ទីរពេទ្យកាល់ម៉ែត ម៉ាស៊ីនទីពីរបានប្រគល់ជូនដល់មន្ទីពេទ្យគន្ធបុប្ផា ម៉ាស៊ីនទីបីបានប្រគល់ជូនទៅកាកបាទក្រហមកម្ពុជា និងម៉ាស៊ីនទីបួនត្រូវបានប្រគល់ជូនទៅគណៈកម្មាធិការជាតិគ្រប់ គ្រងគ្រោះមហន្តរាយ ដោយឡែកម៉ាស៊ីនទីប្រាំនឹងត្រូវប្រគល់ជូនទៅមន្ទីរពេទ្យលោកសង្ឃផងដែរ។

លើសពីនេះទៀត ឯកឧត្តមទេសរដ្ឋមន្ត្រី បានឱ្យដឹងផងដែរថា៖ ឯកឧត្តម និងក្រុមគ្រួសារ នឹងផ្ដល់ជូន ម៉ាស៊ីនAuto Sound  ចំនួនពីរគ្រឿងដែលម៉ាស៊ីននេះអាចតភ្ជាប់ជាមួយនឹងទូរស័ព្ទដៃ Iphone ប្រើ សម្រាប់ពិនិត្យព្យាបាលអ្នកជំងឺ ដើម្បីសម្រួលដល់ការបំពេញភារកិច្ចពិនិត្យព្យាបាលរបស់លោកគ្រូអ្នកគ្រូ នៅក្នុងមន្ទីរពេទ្យ ហើយដោយឡែក ក្រុមហ៊ុនSCI Company Limited ដែលជាក្រុមហ៊ុននាំចូល និង ចែកចាយម៉ាស៊ីនផលិតទឹកបរិសុទ្ធដោយបរិយាកាសនេះ បានផ្ដល់ថវិកាចំនួនមួយម៉ឺនដុល្លារអាមេរិកជូន ដល់មន្ទីរពេទ្យបន្ថែមទៀត។

ឆ្លៀតក្នុងឱកាសនោះ ឯកឧត្តមទេសរដ្ឋមន្ត្រី បានសម្តែងនូវការគោរព និងកោតសរសើរយ៉ាងជ្រាលជ្រៅជូនចំពោះលោកគ្រូពេទ្យ អ្នកគ្រូពេទ្យទាំងអស់ ដែលបានខិតខំប្រឹងជួយសង្គ្រោះ និងព្យាបាលប្រជា ពលរដ្ឋដែលសម្រាកនៅក្នុងមន្ទីរពេទ្យនេះ ជាពិសេសក្នុងដំណាក់កាលនៃការឆ្លងជំងឺកូវីដ-១៩នេះ មន្ទីរ ពេទ្យខ្មែរ-សូវៀតដើរតួនាទីយ៉ាងសំខាន់ក្នុងការពិនិត្យព្យាបាលអ្នកជំងឺកូវីដ-១៩ ឲ្យទទួលបានជោគជ័យ។  
គួរកត់សម្គាល់ថា៖ អំណោយដ៏ថ្លៃថ្លារបស់សម្តេចតេជោនាយករដ្ឋមន្រ្តី និងសម្តេចកិត្តិព្រឹទ្ធបណ្ឌិត នាឱកាសនេះ គឺជាការបង្ហាញនូវកាយវិការប្រកបដោយមនុស្សធម៌ ដែលសម្តេចទាំងទ្វេតែងតែគិតគូរ យកចិត្តទុកដាក់ខ្ពស់ចំពោះសុខទុក្ខរបស់បងប្អូនប្រជាពលរដ្ឋ ធ្វើយ៉ាងណាឲ្យសុខមាលភាព និង ជីវភាពរស់នៅរបស់បងប្អូនកាន់តែមានភាពប្រសើរឡើងពីមួយថ្ងៃទៅមួយថ្ងៃ។

ជាមួយគ្នានេះផងដែរ ថ្លែងទៅកាន់ក្រុមអ្នកសារព័ត៌មាននាឱកាសនោះ លោកសាស្ត្រាចារ្យ ងី ម៉េង នាយកមន្ទីរពេទ្យ ខ្មែរ-សូវៀត បានគូសបញ្ជាក់ថា៖ ម៉ាស៊ីននេះអាចជួយបំពេញសេចក្តីត្រូវការរបស់បង ប្អូនប្រជាពលរដ្ឋដែលកំពុងសម្រាកព្យាបាលជំងឺនៅក្នុងមន្ទីរពេទ្យបានមួយចំណែកធំ មិនថាអ្នកជំងឺ ឬក៏ បងប្អូនអ្នកជំងឺប៉ុណ្ណោះទេ សូម្បីតែបុគ្គលិកបម្រើការក្នុងមន្ទីរពេទ្យរបស់យើង ក៏ម៉ាស៊ីននេះអាចផ្ដល់ផល ប្រយោជន៍បានមួយចំណែកបានផងដែរ។

តាំងនាមឲ្យថ្នាក់ដឹកនាំមន្ទីរពេទ្យ ក៏ដូចជាបុគ្គលិក មន្ត្រីរាជការមន្ទីរពេទ្យ និងបងប្អូនប្រជាពលរដ្ឋដែល កំពុងសម្រាកព្យាបាលនៅក្នុងមន្ទីរពេទ្យនេះ លោកនាយកមន្ទីរពេទ្យ បានថ្លែងអំណរគុណយ៉ាងជ្រាល ជ្រៅជូនចំពោះសម្ដេចទាំងទ្វេដែលតែងយកចិត្តទុកដាក់លើសុខមាលភាពរបស់ប្រជាពលរដ្ឋ និងគិត ពីតម្រូវការជាក់ស្ដែងរបស់មន្ទីរពេទ្យ ក៏ដូចជាប្រជាពលរដ្ឋដើម្បីសម្រួលដល់ជីវភាពប្រចាំថ្ងៃ៕


អត្ថបទទាក់ទង