ព័ត៌មានទាន់ហេតុការណ៍
 1. ស្ត្រីជនជាតិកូរ៉េម្នាក់ បានបើករថយន្តក្នុងល្បឿនលឿន ជ្រុលទៅបុកអ្នកជិះម៉ូតូឌុបគ្នាពីរនាក់ បណ្តាលឲ្យស្លាប់ភ្លាមៗ នៅក្នុងខេត្តព្រះវិហារ !  2. អគ្គិភ័យបានឆាបឆេះរថយន្តមួយគ្រឿង រួមនឹងប្រេងឥន្ទនៈពីរប្រភេទ មានចំណុះជិត២ពាន់លីត្រ ត្រូវបានកម្លាំងនគរបាលខេត្តព្រះវិហារ ចុះជួយធ្វើអន្តរាគមន៍  3. កូនសត្វដំរីដែលមន្ត្រីបរិស្ថានក្នុងដែនជម្រកភ្នំព្រេចប្រទះឃើញកាលពីថ្មីៗនេះ បានបាត់បង់ជីវិតហើយ  4. មន្ទីរបរិស្ថានខេត្តសៀមរាប បានសហការជាមួយអង្គការ មូលនិធិបុរាណវិទ្យា និងអភិវឌ្ឍន៍កម្មវិធីភ្នំគូលែន បានចុះទៅឧទ្យានជាតិព្រះជ័យវរ្ម័ន-នរោត្តម «ភ្នំគូលែន» ដេីម្បីពិនិត្យរូបសត្វមករម្យ៉ាង ដែលមិនធ្លាប់ឃើញនៅក្នុងប្រវត្តិសិល្បៈខ្មែរ  5. សម្តេចពិជ័យសេនា ទៀ បាញ់ អញ្ជើញពិនិត្យការ ដ្ឋានសាងសង់ផ្លូវមួយចំនួនដែលអនុវត្តដោយ កងវិស្វកម្មលេខ១៧៨ ស្ពានថ្នល់ ក្រសួងការពារជាតិ ក្នុងខេត្តព្រះសីហនុ

ក្រសួងបរិស្ថានចូលរួមអនុវត្តយុទ្ធសាស្ត្រជាតិលុបបំបាត់ជំងឺគ្រុនចាញ់ និងជំងឺឆ្លងផ្សេងទៀតចេញពីក្នុងសហគមន៍ក្នុងដែនជម្រកសត្វព្រៃព្រៃឡង់ និងផែនការអភិវឌ្ឍន៍សេដ្ឋកិច្ចសហគមន៍ ដើម្បីគ្រប់គ្រងធនធានធម្មជាតិកាន់តែប្រសើរ
ថ្ងៃ អង្គារ ទី ២៦ ខែ វិច្ឆិកា ឆ្នាំ ២០១៩

ក្រៅពីកិច្ចខិតខំប្រឹងប្រែងក្នុងការគ្រប់គ្រង និងអភិរក្សធនធានធម្មជាតិ ជីវៈចម្រុះដែលកម្ពុជាមាន ក្រសួងបរិស្ថានប្តេជ្ញាចិត្តចូលរួមលុបបំបាត់ជំងឺគ្រុនចាញ់ចេញពីសហគមន៍តំបន់ការពារធម្មជាតិនានា ក្នុងដែនជម្រកសត្វព្រៃ «ព្រៃឡង់» ឱ្យអស់ នៅត្រឹមឆ្នាំ ២០២៥ ស្របតាមផែនការយុទ្ធសាស្ត្រជាតិលុបបំបាត់ជំងឺគ្រុនចាញ់ក្នុងព្រះរាជាណាចក្រកម្ពុជាឆ្នាំ ២០១១-២០២៥ និងកាត់ផ្តាច់ទាំងស្រុងជំងឺឆ្លងផ្សេងទៀតដូចជាជំងឺអេដស៍ ជំងឺគ្រុនឈាមជាដើមចេញពីសហគមន៍តំបន់ការពារធម្មជាតិផងដែរ។ ការតាំងចិត្តនេះត្រូវបានធ្វើឡើងក្នុងអំឡុងពេលនៃដំណើរចុះពិនិត្យស្ថានភាពការងារគ្រប់គ្រង និងអភិរក្សដែលជម្រកសត្វ ព្រៃព្រៃឡង់ និងសាកសួរសុខទុក្ខ សំណេះសំណាលជាមួយមន្ត្រីឧទ្យានុរក្ស និងប្រជាសហគមន៍តំបន់ការ
ពារធម្មជាតិនៅក្នុងភូមិសាស្ត្រខេត្តកំពង់ធំ កាលពីថ្ងៃទី២៦ ខែវិច្ឆិកា ឆ្នាំ ២០១៩ របស់ប្រតិភូក្រសួងបរិ
ស្ថានដឹកនាំដោយឯកឧត្តមរដ្ឋមន្ត្រី សាយ សំអាល់ ដោយមានការចូលរួមពីតំណាងរាស្ត្រមណ្ឌលកំពង់ធំ ប្រតិភូក្រសួងសុខាភិបាល ទីភ្នាក់ងារសហរដ្ឋអាមេរិកសម្រាប់អភិវឌ្ឍន៍អន្តរជាតិ USAID និងដៃគូអភិវឌ្ឍន៍និងស្ថាប័នពាក់ព័ន្ធនានា។

    នៅចំពោះមុខមន្ត្រីឧទ្យានុរក្ស និងប្រជាសហគមន៍តំបន់ការពារធម្មជាតិជាច្រើនរយនាក់ ឯកឧត្តម  សាយ សំអាល់ រដ្ឋមន្ត្រីក្រសួងបរិស្ថាន បានមានប្រសាសន៍ថា៖ « ការលប់បំបាត់ជំងឺឆ្លង ការគិតគូរពីសន្តិសុខស្បៀងនិងអាហារូបត្ថម្ភ ការទទួលបានការអប់រំ គឺជាមូលដ្ឋានគ្រឹះនៅក្នុងការលើកស្ទួយជីវភាពរស់នៅរបស់ប្រជាសហគមន៍មូលដ្ឋាន ដោយរក្សាបាននូវវប្បធម៌ ប្រពៃណី ទំនៀមទម្លាប់ ជំនឿ សាសនា និងជាតិសាសន៍របស់ខ្លួន សំដៅបង្កើតជាទេសចរណ៍ធម្មជាតិ ដែលអាចង្កើនសេដ្ឋកិច្ចគ្រួសារ»។ ឯកឧត្តមរដ្ឋមន្ត្រី បានបន្ថែមទៀតថា៖«យើងត្រូវរួមគ្នាបង្កើនសេដ្ឋកិច្ចនិងលើកកម្ពស់ជីវភាពប្រជាពលរដ្ឋឱ្យកាន់តែ ប្រសើរថែមមួយកម្រិតទៀតដើម្បីបង្កើនប្រសិទ្ធភាពគ្រប់គ្រងនិងអភិរក្សធនធានធម្មជាតិឱ្យនភគង់វង្សសម្រាប់មនុស្សរាប់ជំនាន់តទៅមុខទៀត។ ក្រសួងបរិស្ថានបានកំណត់ផែនការអភិវឌ្ឍន៍សេដ្ឋកិច្ចសហគមន៍ ដើម្បីគ្រប់គ្រងធនធានធម្មជាតិកាន់តែប្រសើរនៅក្នុងក្របខណ្ឌទូទាំងប្រទេស ហើយព្រៃឡង់គឺជាការចាប់ផ្តើម
ដ៏សំខាន់មួយ»។

ឯកឧត្តមរដ្ឋមន្ត្រី សាយ សំអាល់ បានសង្កត់ធ្ងន់ថា តំបន់ការពារធម្មជាតិរបស់ប្រទេសកម្ពុជា មានលក្ខណៈពិសេសដោយមានប្រជាពលរដ្ឋរស់នៅជាមួយនឹងធនធានធម្មជាតិ ហើយការការពារ និងអភិរក្សធនធានធម្មជាតិប្រកបដោយនិរន្តរភាព សម្រាប់កូនចៅជំនាន់ក្រោយ ចាំបាច់ត្រូវមានការចូលរួមពីអ្នកពាក់ព័ន្ធគ្រប់ទាំងអស់ ជាពិសេសធ្វើឱ្យសហគមន៍មានសេដ្ឋកិច្ចរឹងមាំ និងរីកចម្រើន។ ឯកឧត្តម សាយ សំអាល់ បានបញ្ជាក់ថា រាជរដ្ឋាភិបាលកម្ពុជា ស្តែងចេញពីការយកចិត្តទុកដាក់ពី សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា អញ្ជើញចូលរួមជាអធិបតីដ៏ខ្ពង់ខ្ពស់ក្នុងវេទិកាថ្នាក់ជាតិ «ការការពារ និងអភិរក្សធនធានធម្មជាតិ» ចំនួន ២លើករួចមកហើយ នៅឆ្នាំ២០១៦ និងឆ្នាំ ២០១៧ បានបង្ហាញគោលបំណងជាយុទ្ធសាស្រ្ត និងចក្ខុវិស័យច្បាស់លាស់ ធ្វើយ៉ាងណាឱ្យភាគីពាក់ព័ន្ធទាំងអស់ចូលរួមការពារ និងអភិរក្សធនធានធម្មជាតិ។

ក្នុងឱកាសនោះដែរ ឯកឧត្តមរដ្ឋមន្រ្តី បានប្រកាសពីផែនការអាទិភាពសម្រាប់អភិវឌ្ឍន៍សេដ្ឋកិច្ចសហគមន៍ រួមមានការលើកកម្ពស់ជីវភាពសហគមន៍ឱ្យប្រសើរឡើង តាមរយៈការជួយឱ្យសហគមន៍
កសាងហេដ្ឋារចនាសម្ព័ន្ធ ការលើកកម្ពស់សុខភាព ការចិញ្ចឹមសត្វ ការជំរុញឱ្យកូនចៅប្រជាពលរដ្ឋនៅតាមសហគមន៍ បានរៀនសូត្រខ្ពង់ខ្ពស់ និងទទួលបានការបណ្តុះបណ្តាលវិជ្ជាជីវៈ ងាកចេញពីការពឹងផ្អែកលើធនធានធម្មជាតិ មករកជម្រើសមុខរបរថ្មី ដូចជាវិស័យឧស្សហកម្ម និងសេវាកម្មជាដើម។ ជាមួយគ្នានេះដែរ ឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន បានលើកទឹកចិត្តឱ្យប្រជាពលរដ្ឋនៅតាមសហគមន៍ អភិវឌ្ឍន៍ទេសចរណ៍ធម្មជាតិ ដែលក្នុងនោះក្រសួងបរិស្ថាន និងក្រសួងទេសចរណ៍នឹងសហការរៀបចំ និងជួយបណ្តុះបណ្តាលជំនាញទេសចរណ៍ធម្មជាតិ ដើម្បីបង្កើនជីវភាពដល់ប្រជាសហគមន៍ថែមទៀត។

នៅក្នុងឱកាសនោះ សហគមន៍តំបន់ការពារធម្មជាតិចំនួន ២ គឺសហគមន៍តំបន់ការពារធម្មជាតិក្បាលដូនតី និងសហគមន៍ការពារធម្មជាតិជាំម្រេចនៅក្នុងខេត្តកំពង់ធំ បានចុះហត្ថលេខាលើកិច្ចព្រមព្រៀងជាមួយ ឯកឧត្តម នង វាសនា តំណាងរាស្រ្តមណ្ឌលកំពង់ធំ ដើម្បីអភិវឌ្ឍជីវភាពសហគមន៍ ដោយទទួលបានការផ្តល់ការគ្រប់គ្រងទឹកស្អាតប្រើប្រាស់ក្នុងសហគមន៍ចំនួន ៣ ឆ្នាំជាប់គ្នា ដោយក្នុង ១ ឆ្នាំសហគមន៍នីមួយៗទទួលថវិកាចំនួន ៥០០០ ដុល្លារ។ គណៈប្រតិភូក៏បានចែកមុងជ្រលក់ថ្នាំការពារជំងឺគ្រុនចាញ់ជូនដល់មន្ត្រីឧទ្យានុរក្ស និងប្រជាពលរដ្ឋមូលដ្ឋានផងដែរ។ ជាមួយគ្នានេះ ឯកឧត្តម សាយ សំអាល់ និងប្រតិភូក្រសួង ស្ថាប័នពាក់ព័ន្ធ អាជ្ញាធរខេត្ត និងតំណាងដៃគូអភិវឌ្ឍន៍ បានចុះពិនិត្យដោយផ្ទាល់ព្រៃឈើក្នុងតំបន់ដែនជម្រកសត្វព្រៃ«ព្រៃឡង់»។

    ព្រៃឡង់ត្រូវបានកំណត់ជាដែនជម្រកសត្វព្រៃ«ព្រៃឡង់» លើទំហំផ្ទៃដី ៤៣១ ៦៨៣ ហិកតាស្ថិតនៅក្នុងភូមិសាស្ត្រខេត្តកំពង់ធំ ខេត្តក្រចេះ ខេត្តព្រះវិហារ និងខេត្តស្ទឹងត្រែង តាមអនុក្រឹត្យលេខ៧៤ អនក្រ.បក ចុះថ្ងៃទី៩ ខែឧសភា ឆ្នាំ ២០១៦ និងមានមន្ត្រីឧទ្យានុរក្សចំនួន ៨៣ នាក់បាននិងកំពុងឈរជើង ការពារនិងអភិរក្ស ក្រោយពីមានការផ្ទេរសមត្ថកិច្ចគ្រប់គ្រងពីក្រសួងកសិកម្ម រុក្ខាប្រមាញ់ និងនេសាទមកឱ្យក្រសួងបរិស្ថានគ្រប់គ្រងកាលពីខែមេសា ឆ្នាំ ២០១៦។ នៅឆ្នាំ ២០១៩ នេះ ក្រសួងបរិស្ថាន បានរៀបចំបង្កើត និងការប្រកាសទទួលស្គាល់ជាផ្លូវការសហគមន៍ការពារធម្មជាតិចំនួន ១៩ ដែលមានប្រជាពលរដ្ឋជាច្រើនម៉ឺននាក់ដែលកំពុងរស់នៅក្នុង និងក្បែរដែនជម្រកសត្វព្រៃ «ព្រៃឡង់» ក្នុងបំណងបង្កើនការចូលរួមគ្រប់គ្រងប្រើប្រាស់ធនធានធម្មជាតិប្រកបដោយចីរភាព និងចូលរួមចំណែក ក្នុងការលើកកម្ពស់ជីវភាពសហគមន៍មូលដ្ឋាន ស្របតាមគោលនយោបាយរបស់រាជរដ្ឋាភិបាលកម្ពុជា។

    គណៈប្រតិភូនៃស្ថាប័នពាក់ព័ន្ធ បានវាយតម្លៃខ្ពស់ចំពោះកិច្ចខិតខំប្រឹងប្រែងរបស់របស់មន្ត្រីឧទ្យានុរក្សនៃ ក្រសួងបរិស្ថាន ដែលបានលះបង់សព្វបែបយ៉ាង ដើម្បីការពារនិងអភិរក្សដែនជម្រកព្រៃព្រៃឡង់ ក៏ដូចជាការចូលរួមរបស់ប្រជាសហគមន៍តំបន់ការពារធម្មជាតិក្នុងការងារអភិរក្ស។ អាស្រ័យដោយសារកិច្ចខិតខំប្រឹងប្រែង នៅក្នុងការគ្រប់គ្រងតំបន់ការពារធម្មជាតិបានល្អប្រសើរ កម្ពុជាបានលក់ឥណទានកាបូននៅក្នុងដែនជម្រកសត្វព្រៃកែវសីម៉ា ដែនជម្រកសត្វព្រៃព្រៃឡង់ (ក្នុងភូមិសាស្ត្រខេត្តស្ទឹងត្រែង) ដែនជម្រកសត្វព្រៃក្រវ៉ាញខាងត្បូង និងដែនជម្រកសត្វព្រៃតាតៃ ក្នុងក្របខណ្ឌទីផ្សារស្ម័គ្រចិត្ត ដោយទទួលបានថវិកាសរុបប្រមាណ ១១ លានដុល្លារអាមេរិក សម្រាប់ទ្រទ្រង់ដល់ការការពារនិងអភិរក្ស ក៏ដូចជាជួយលើកកម្ពស់ជីវភាពរបស់សហគមន៍មូលដ្ឋាន ដែលឆ្លើយតបនឹងគោលការណ៍ហិរញ្ញប្បទាននិរន្តរភាព៕