ការិយាល័យទី៤ កងទ័ពជើងគោក ប្រារព្ធពិធីបិទវគ្គបំប៉នជំនាញការងារភស្តុភារ កងទ័ពជើងគោក ឆ្នាំ២០១៩
ថ្ងៃ សុក្រ ទី ១៥ ខែ វិច្ឆិកា ឆ្នាំ ២០១៩

បន្ទាប់ពីបានហ្វឹកហ្វឺនរៀនសូត្រអស់រយៈពេល២៦ថ្ងៃរួចមក នៅព្រឹកថ្ងៃទី១៥ ខែវិច្ឆិកា ឆ្នាំ២០១៩នេះ នៅការិយាល័យទី៤  កងទ័ពជើងគោក  បានដំណើរការបិទវគ្គហ្វឹកហ្វឺនបំប៉នជំនាញការងារភស្តុភារ ប្រចាំឆ្នាំ២០១៩  ជូនដល់យោធិនចំណុះបញ្ជាការដ្ឋានកងទ័ពជើងគោក នៃកងយោធពលខេមរភូមិន្ទ ស្ថិតក្រោមអធិបតីភាព ឯកឧត្តម   ឧត្តមសេនីយ៍ទោជ វណ្ណារិទ្ធ នាយសេនាធិការរង នាយការិយាល័យទី៤  កងទ័ពជើងគោក និងមានការចូលរួមផងដែរពីសំណាក់ឯកឧត្តម អស់លោកជានាយរងការិយាល័យ  និងនាយទាហានជាន់ខ្ពស់ចំណុះការិយាល័យទី៤ កងទ័ពជើងគោកជាច្រើនរូបទៀត ។

នៅក្នុងរបាយការណ៍បិទវគ្គដែលផ្តល់ដោយឯកឧត្តម ឧត្តមសេនីយ៍ត្រី ដួង វណ្ណនឿន នាយរងការិយាល័យទី៤   កងទ័ពជើងគោកបានឲ្យដឹងថា៖ វគ្គបំប៉នជំនាញ ការងារភស្តុភារ កងទ័ពជើងគោក ឆ្នាំ២០១៩ នេះជាវគ្គហ្វឹកហ្វឺនរៀនសូត្រក្រៅពីសន្ទស្សន៍ផែនការហ្វឹកហ្វឺនប្រចាំ២០១៩ ដែលចាប់បើកពិថ្ងៃទី១១  ខែកក្ដដា  រហូតដល់ថ្ងៃទី១៨ ខែតុលា ឆ្នាំ២០១៩ រយះពេលសិក្សាចំនួន ២៦ថ្ងៃ ។ មានសមាសភាពកម្មសិក្សាការីចូលរួមរៀនសូត្រ សរុបចំនួន ៥៥នាក់។

មកពីបណ្តាកងឯកភាពចំណុះបញ្ជាការដ្ឋាន កងទ័ពជើងគោក មាន១៥ការិយាល័យ និង០១បញ្ជាការដ្ឋាន ។ សិក្សាខ្លឹមសារមេរៀន រួមមាន៖ ជំនាញស្បឿង យោធបរិក្ខារ ប្រេងឥន្ទនៈ ដឹកជញ្ជូន ផែនការ និងភស្តុភារ  ។ក្រោយបញ្ចប់វគ្គសិក្ខាកាមទទួលបានលទ្ធផល និទ្ទេសល្អប្រសើរចំនួន២៩ភាគរយ  ល្អចំនួន ៣៩ភាគរយ ល្អបង្គួរចំនួន  ២១ភាគរយ និងមធ្យមចំនួន០៦ភាគរយ ។

របាយការណ៍ក៏បានបញ្ជាក់ទៀតថា នោក្នុងឆ្នាំ២០១៩នេះ ការិយាល័យទី៤ កងទ័ពជើងគោក បានសហការជាមួយទីចាត់ការចលនូប្បត្ថមអគ្គបញ្ជាការ និងដោយមានការជួយឧបត្ថមគាំទ្រសម្របសម្រួលពីឯកឧត្តម នាយឧត្តម ម៉ក់ សារុន អគ្គមេបញ្ជាការរង នៃ ខ ភ ម និងឯកឧត្តម មេបញ្ជាការកងទ័ពជើងគោក បានដំណើរការបើកវគ្គជំនាញភស្តុភារ ឆ្នាំ២០១៩ បានចំនួន ០៣វគ្គ ហើយវគ្គទី៣ ជាវគ្គដែលបានប្រារព្ធបិទនាថ្ងៃនេះ មានសិក្ខាកាមសរុបចំនួន ២៣៩នាក់ ។

នៅក្នុងឪកាសនោះឯកឧត្តម ជ វណ្ណារិទ្ធ  ក៏បានអញ្ជើញប្រគល់លិខិតបញ្ចាក់ការសិក្សាដល់សិក្ខាកាមជាបន្តបន្ទាប់ផងដែរ ។អញ្ជើញមានប្រសាសន៍នៅក្នុងពិធីបិទវគ្គនាឱកាសនោះ ៖ ឯកឧត្តម ជ វណ្ណារិទ្ធ បានពាំនាំបណ្តាំផ្ញើរសាកសួរសុខទុក្ខពីសំណាក់ឯកឧត្តមមេបញ្ជាការកងទ័ពជើងគោក ជូនចំពោះសិក្ខាកាម និងនាយទាហាន នាយទាហានរង និងពលទាហានទាំងអស់ ។