ចិនបញ្ជាក់ថា កិច្ចចរចាពាណិជ្ជកម្មជាមួយសហរដ្ឋអាម៉េរិកកំពុងដំណើរការទៅមុខ យ៉ាងល្អប្រសើរ
ថ្ងៃ ព្រហស្បតិ៍ ទី ៣១ ខែ តុលា ឆ្នាំ ២០១៩

ចិន៖ ក្រសួងពាណិជ្ជកម្មចិននៅថ្ងៃព្រហស្បតិ៍នេះ បានលើកឡើងថា ការចរចាគ្នាផ្នែកពាណិជ្ជកម្មរវាងរដ្ឋាភិបាលក្រុងប៉េកាំង និងទីក្រុងវ៉ាស៊ីនតោន បាននឹងកំពុងតែដំណើរការទៅមុខប្រកបដោយភាពល្អប្រសើរ ស្របពេលដែលអ្នកតំណាងផ្នែកពាណិជ្ជកម្មភាគីទាំងពីរ គ្រោងនឹងធ្វើការសន្ទនាគ្នាតាមទូរសព្ទជាថ្មីម្តងទៀតនៅក្នុងថ្ងៃសុក្រសប្តាហ៍នេះ។

បើតាមក្រសួងពាណិជ្ជកម្មចិន ក្រុមប្រតិភូសហរដ្ឋអាម៉េរិក និងចិន តែងតែរក្សាទំនាក់ទំនងគ្នាយ៉ាងជិតស្និទ្ធ ហើយពួកគេនឹងបន្តជំរុញការពិគ្រោះយោបល់ និងការងារផ្សេងៗទៀតដូចតាមការគ្រោងទុក។

សូមជម្រាបជូនផងដែរថា នាពាក់កណ្តាលខែវិច្ឆិកាខាងមុខនេះ ប្រធានាធិបតីអាម៉េរិកលោក ដូណាល់ ត្រាំ និងសមភាគីចិន លោក ស៊ី ជិនពីង នឹងត្រូវជួបពិភាក្សាគ្នាជាថ្មី ហើយកិច្ចព្រមព្រៀងមួយចំនួនដែលមានគោលដៅបន្ធូរបន្ថយកម្តៅនៃសង្គ្រាមពាណិជ្ជកម្មក៏ទំនងជាត្រូវចុះហត្ថលេខាផងដែរ៕ធ.ដ


អត្ថបទទាក់ទង