ក្រុមយុវជនវត្តវារិន្ទព្រែកលៀប ឈរលើកំពូលតារាងនៅក្នុងសប្តាហ៍ទី៦ នៃពានរង្វាន់ ទីលានបាល់ទាត់ដំរីសឆ្នាំ២០១៩ បន្ទាប់ពីយកឈ្នះក្រុម RFL ៥ទល់នឹង១
ថ្ងៃ អង្គារ ទី ២៧ ខែ សីហា ឆ្នាំ ២០១៩

ភ្នំពេញ៖ ក្រុមយុវជនវត្តវារិន្ទព្រែកលៀប បានឡើងឈរលើកំពូលតារាងនៅក្នុងសប្តាហ៍ទី៦ នៃពានរង្វាន់ទីលានបាល់ទាត់ដំរីសឆ្នាំ២០១៩ បន្ទាប់ពីយកឈ្នះក្រុម RFL ៥ទល់នឹង១ កាលពីចុងសប្តាហ៍ ដោយឡែក៥ប្រកួតផ្សេងទៀត គឺក្រុមTurtle ឈ្នះក្រុម Sakura ៦ទល់នឹង៣ ក្រុម Khmer United B ឈ្នះក្រុម Rita ៣ទល់នឹង០ ក្រុមBlue Dragon ឈ្នះក្រុមKhmer United A ២ទល់នឹង១ ក្រុម Fun sport ស្មើរជាមួយនឹងក្រុម Bassac ២ទល់នឹង២ និងក្រុម Sniper ឈ្នះក្រុម Kw Khmer real estate ៦ទល់នឹង១។

លោក ឯក សុវណ្ណដា អ្នករៀបចំការប្រកួតបានឱ្យដឹងថា ទីលានបាលទាត់ដំរីស បានរៀបចំការប្រកួតនេះឡើងរយៈពេលជិត១០ឆ្នាំមកហើយ ក៏ទទួលបានការគាំទ្រពីសំណាក់យុវជនដែលស្នេហាវិស័យកីឡាបាល់ទាត់នេះចូលរួមយ៉ាងកុះករផងដែរ។ មិនតែប៉ុណ្ណោះព្រឹត្តិការណ៍នេះ គឺបានធ្វើឱ្យមហាជន យុវជន ដែលមកពីកន្លែងផ្សេងគ្នា បានរាប់អានគ្នា និងរឹតចំណឹងមិត្តភាព សាមគ្គីភាពរវាងគ្នានឹងគ្នា ជៀសវាងការទំនេរពីការសិក្សា ឬការងារ ទៅប្រព្រឹត្តអំពើអបាយមុខផ្សេងៗ ដែលសង្គមស្អប់ខ្ពើម ជាពិសេសលេងកីឡានាំមកនូវសុខភាពរឹងមាំ។

សូមបញ្ជាក់ថា បច្ចុប្បន្នកីឡាបាល់ទាត់គឺមានការគាំទ្រ និងពេញនិយមយ៉ាងខ្លាំងពីសំណាក់យុវជន មហាជន ជាមួយគ្នានោះវិស័យឯកជនក៏បានសហការក្នុងការបំផុសវិស័យកីឡា ដោយបង្កើតនូវព្រឹត្តិការណ៍កីឡា និងកៀរគរឱ្យមានការចូលរួមមហាជន៕ធ.ដ


អត្ថបទទាក់ទង